- مين فينا مش بيخاف ؟!

- مين مش بيخاف يغير شغله و يسيب الاستقرار حتي لو شغله ده هو مش ناجح فيه و عنده افكار تنجحه و تعمله مشروع يغير حياته ؟! 

- مين مش بيخاف يصالح مراته الاول و يغير من نفسه عشانها حتي لو متأكد ان الغلط منه.. بس خايف انها تتعود علي كدة او تتغر عليه..او ينزل من نظرها.. ؟!

- مين مش بيخاف علي عياله و ممكن يحرمهم من متع كتير في حياتهم عشان بس خايف عليهم ؟!

- مين مش بتخاف تبدأ علاقة حلوة مع اهل جوزها و تسامح و تنسي ليفتكروها ضعيفة او مجبورة ؟!

- مين مش بيخاف يعترف بغلطه عشان منظره قدام الناس ؟!

- مين الاب اللي مش بيخاف فبييجي علي عريس بنته و يدفعه في مسميات مالهاش لازمة، وممكن يبوظ الجوازة او يخليهم يبتدوا حياتهم مديونين.. عشان بس.. كلام الناس ؟! 

- مين الام اللي استحملت ظلم واهانة وخيانات متكررة وعاشت عيشة ما تتوصفش عشان بس خايفة لو اتطلقت هتصرف علي عيالها منين أو المجتمع هيقول عليها ايه ؟!

- كام واحدة سكتت واتنازلت عن حقوقها عشان خايفة من الفضايح ؟!

- كام واحد خاف يرجع الحقوق لاصحابها عشان خايف ليكونوا نسيوا ويفتح الموضوع ويبقي شكله وحش من تاني ؟!

عارفين ربنا سبحانه و تعالي قال ايه علي الخوف؟

"إِنَّمَا ذَٰلِكُمُ الشَّيْطَانُ يُخَوِّفُ أَوْلِيَاءَهُ فَلَا تَخَافُوهُمْ وَخَافُونِ إِن كُنتُم مُّؤْمِنِينَ"

الخوف دايما من الشيطان، هو اللي مش عايزنا "نتوكل علي الله"، مش عايزنا نغير حياتنا للاحلي...