إعرف نفسك

بقلم - آلاء محمود

إعرف نفسك..

إعرف كده إن كل كلمة بتقولها لنفسك هتأثر عليك!! ازاي هقولك ..

كل فكرة سلبية هتيجي علي بالك هتتحول لكلام هتقوله لنفسك زي أنا فاشل أنا مش هقدر أنا أنا أنا....؛ كل كلمة من دول بقي هتتحول لفعل ومن فعل لعادة ومن عادة لتكوين شخصية غير قادرة علي تحمل أي شئ، ومن شخصية لصنع قدر والقدر هيبقي حياة بلا أي طعم ولا قيمة!!

ثق في نفسك .. 

اعرف قدراتك مهاراتك ميولك  مميزاتك واتغلب علي عيوبك ويأسك.. ومتلومش نفسك علي تقصيرها أحيانا الظروف بتبقي أقوي .. بل بالعكس كافأها من فتره للتانيه .. 

إسرح بنعم ربنا اللي وهبها ليك واحمد ربنا عليها ..

متقارنش نفسك بحد ..

دايما قول لنفسك أنا عندي اللي مش عند غيري .. أنا حد مختلف .. قول لنفسك كده حتي لو انت مش كده .. كده كده عقلك الباطن مبيفرقش بين الشئ الحقيقي والغير حقيقي !!

طب هو انا بقول الكلام ده كله ليه .. ليه دي بقي .. ركز في اللي جاي

عشان تعرف تحدد هدفك لازم تعرف الكلمتين اللي كانوا فوق دول .. أيون اللي عينك جت عليهم دول تاني 

طب وهو انا ليا هدف اساسا !! 

الله بقا .. طب بص يا عم كده معايا  

كل واحد فينا اتخلق عشان هدف .. ربنا بيقول في كتابه العزيز (إني جاعل في الأرض خليفة)، (وما خلقت الجن والإنس إلا ليعبدون)، (أفحسبتم إنما خلقناكم عبثاً وإنكم إلينا لا ترجعون).. صدق الله العظيم

وكمان حديث الرسول _عليه الصلاة والسلام _ (فإن حق الله علي العباد أن يعبدوه ولا يشركوا به شيئاً).. صدقت يا رسول الله

يااااااه .. يعني إحنا أصلا فيه هدف رئيسي كده كده لازم يكون في أول القايمة وهو "عبادة الرحمن" .. طب وده هيبقي إزاي .. بإنك تعبد ربنا بالطريقه اللي بيحبها ويرضاها .. انك تقتدي برسوله في كل خطوة بحياتك .. بس كده ..

بعد ما عرفنا هدفنا الرئيسي....اللي موجودين بسببه في الدنيا .. تفتكر فيه أهداف تانية ممكن نعملها .. آه فيه .. فيه كتيــــــر!!

فيه إنك نفسك تكون دكتور مهندس معلم حد مختلف.. باختصار .. من عمار الأرض..

طب ازاي احدد هدفي .. اي مواصفاته.. هيأثر عليا ازاي

لازم تكون عارف ان وجودك بالحياة مش عشان تنام وتاكل وتاكل وتنام!!

انت موجود عشان تعمر الأرض .. عشان يكون لك هدف تعيش عشانه .. عشان تخطط له صح .. عشان تعيش وانت راضي ومبسوط ومطمن لما تموت الناس تحكي عنك بالخير ويكون ليك تأثير عليهم.. 

ان يكون ليك هدف بالحياة.. يعني انت ليك وجود وقيمة بالحياة

من غير هدف زيك زي اللي تايه بالصحرا لا معاه دليل ولا مرشد يرشده.. فبيفضل يلف حوالين نفسه وبيجهدها عالفاضي والمليان!!

السعاده ...ان تكون عارف انت عاوز ايه من الدنيا وتسعي للي انت عاوزه .. انك تكون قوة من قوى الحياة مش مجرد شئ صغير مالهوش لازمه عشان مش باين حتي بالميكرسكوب!!

الكارثه مش فانك مش قادر توصل لهدفك..الكارثه ان ميكنش ليك هدف أساساً !!

وبما ان قدوتنا العظمي بها الحياة هو حبيبي وحبيبك سيدنا المصطفي عليه الصلاة والسلام، خليني اقولك ان لما سيدنا الرسول بعث معاذ بن جبل لليمن وأوصاه بـ (انك تأتي قوما من اهل الكتاب، فليكن اول ما تدعوهم إليه شهادة ان لا اله الا الله ، فان اطاعوك لذلك فاعلمهم ان الله افترض عليهم خمس صلوات في كل يوم وليلة، فان اطاعوك لذلك فاعلمهم ان الله افترض عليهم صدقة تؤخذ من أغنيائهم فترد علي فقرائهم، فان اطاعوك لذلك فإياك وكرائم أموالهم وإتقِ دعوة المظلوم فانها ليس بينها وبين الله حجاب)

لو هنفسر الوصية دي .. هنلاقي ان معاذ له رسالة وهي الحكم بالعدل والقيام بواجب الدعوة الي الله .. والرسول رسمله رؤية واضحة تتحقق باهداف مرتبة وفق أهميتها لتحقيق رؤيته واللي بدأت بالتوحيد وآخرها تجنب الظلم.

عشان تحدد هدفك.. لازم تعرف كام حاجه الاول وهي: ان يكون هدفك ده واضح .. محدد .. واقعي .. طموح .. نافع ليك ولمجتمعك .. وانت مؤمن بيه.. 

وعشان تحقق هدفك لازم تعافر .. تصبر .. يكون عندك (أمل - تفاؤل - ثقة بالله - ثقة بنفسك - تتوكل علي الله - تاخد بالاسباب - تتخيل تفاصيل هدفك  - ركز عليه عشان ده سبب رئيسي فانك تنجح وتحقق هدفك)

كمان حاجه أخيره .. لو حطيت ببالك انك عاوز تحقق كل حاجه مش هتحقق حاجه .. انما قلل أهدافك إختار الأهم منها .. ركز واشتغل عليها .. عشان لو زادت قدراتك هتقل وهتضعف عزيمتك.

أحدد هدفي ازاي .. 

ورقه وقلم .. اكتب كل احلامك بالاول 

انسي واتجاهل ان ممكن يقابلك مشاكل وعقوبات عشان تعرف تفكر بايجابيه 

حدد أهدافك اللي عاوز توصلها 

اكتب نقاط قوتك ونقاط ضعفك

إوصل ما بينهم بناء علي احلامك 

خد برأي حد انت واثق فيه 

اكتب ثمرات هدفك واتأملها وبصلها كل يوم .. هتزود من عزيمتك واصرارك بانك تحقق هدفك 

يوم ما تضعف او تكسل .. بص لثمرات هدفك واستمد قوتك تاني منها 

دايما تشجع نفسك بانك هتقدر .. ان ربنا معاك .. ولما تقع متيأسش 

انسي كلمه مستحيل .. الغيها من قاموسك يا عم 

نظم وقتك .. لان عامل الوقت مهم جدا في تحديد الهدف بانك تخلي عندك نقطة بداية ونقطة نهايه 

متأجلش حاجه لبكره .. وافتكر قول الله _عز وجل _(ولا تقولن لشئ اني فاعل ذلك غدا .. إلا أن يشاء الله...) صدق الله العظيم

متنساش ربنا .. قربله .. استعين بيه دايما .. خلي ربنا مصدر العون ليك 

A Goal without a plan is just a wish