العادات والتقاليد

بقلم - داليا حجازي 

العادات والتقاليد .. كلمتين من أثقل الكلمات في اللغة العربية كلها .. 

كلمتين في الوقت بتاعنا دا بيتصنفوا تحت أى حاجة وخصوصا لو حاجة تخص البنت .. أياً كان بقا .. بتعطس بتكح يقولوا عيب عاداتنا وتقاليدنا بتقول البنت مش تعطس .. لا حضرتك .. دا عاداتك وتقاليدك انت مش "نا" خالص، الجمع دا تجمعه في حاجة فعلا تستاهل .. انما تخترع ..لا !! 

يعنى خد عندك يا سيدى الفاضل : 

واحدة أجنبية نزلت مصر لابسة قصير ومسيبة شعرها .. المجتمع أبو عادات يقولك تلبس إللى هيا عايزاه دى حرية شخصية.

طب ما المصرية لو عملت كدا هتبقا وحشة وسفلة ومش متربية ومنحلة رغم أن الاتنين بشر .. والاتنين تحكمهم عادات وتقاليد بردو 

يعنى مفيش أجنبية تنزل السعودية بشورت .. ممنوع ..علشان دى عادات وتقاليد بلد مش أشخاص.

اشمعنا بلدنا بقا !! 

ما هو لو في عادات وتقاليد يبقا المفروض نمشي علي عادات وتقاليد البلاد مش الاشخاص .. متعينش نفسك رئيس جمهورية العادات والتقاليد وانت مش عارف اية أساسها أصلا ..

العادات والتقاليد في مصر بقت بتنزل واحدة واحدة لقلة الأدب لدرجة انك بتحاول توصل لأعلى درجة لراحة ضميرك في الغلط 

مين عيّنك تتحكم ف لبس الناس؟ .. تتحكم ف تفاصيل الناس؟ .. تتحكم فيهم ليه انت مين اصلا؟!

خلاص بقيت مكتمل لدرجة انك فاضى تصحح العادات والتقاليد للبشر .. 

مين علمك تدى مبررات لنفسك على حاجة غلط؟!

تعالى اعرف العادات والتقاليد العامة .. 

1 ) انك تحترم الناس وارائها وتفكرها وتبطل تتعدى عليهم بالسب واللعن.. 

٢) انك تتعرف على أ - ب عادات وتقاليد .. وزى ما بتحكم جوة أحكم برة أدام نفسك علشان دى حاجة وجدانية هتتحاسب عليها وبتيجى تحت مسمى "نفاق" "افترى" " تعدى"

انت مش ربنا ... "استغفر الله العظيم"

انت كائن عايش في امتحان زيك زى إللى لابسة قصير واللى بتشرب سجاير واللى قصة شعرها زى الولد ..

كله ليه رب كريم  وملكين .. 

تيجى انت فيهم ايه يا انسان ياللى أصلك من طين وأخرك في الطين وهتتحاسب على كل حاجة .. حتى بصتك وتفكيرك ونيتك

نفسك أولى بيك .. هي محتاجة انك تفرض عليها العادات والتقاليد وزى ما هتفرض عليها الصح .. كل تصرفاتك هتبقا صح 

#صلح_من_نفسك