ضحكة × شات (ههههههههههههه)

بقلم - بلال أبوذكري

( ههههههههههههههههههههههههه )

إيه رأيك في الضحكة دي ؟؟ حلوة مش كده ؟! 

طب إقرأها تاني كده ؟؟ لا معلش إقرأها بتمعن !!

حسيتها ؟؟ حسيت فرحتي وأنا بضحكها ؟ تقدر تتأكد إذا كنت أنا فرحان ولا لأ أصلا ؟؟

دي ضحكة مكتوبة طالعة من قلب كيبورد  مابيحسش

مش طالعة من قلب واحد أدامك عشان تحس بيها 

زيها زي 100 ضحكة و100 إيموشن

بيطلع عشان ضغطة ماوس أو كيبورد

مش عشان دقة قلب خلت بؤك يستجيب لقلبك  يبين سنانك اللي مستخبية ورا شاشة !!

عندك 4999 صديق و20 ألف فولورز!! وإيه يعني ؟!

أحب أقولك إن أنت وحيد ! ( مش وحيد القرموطي )

شوف كام واحد من الفرندز مشافش ضحكتك دي ولا أنت شوفته وهو زعلان !

مبصتش لعينه و هو بـ (يرص) شوية حروف جمب بعض عشان تعرف إذا كان صادق ولا لأ !

بقينا راضخين لشوية شاشات .. بقينا نخدمها من غير مقابل

ولو كان فيه مقابل .. هتلاقيه 2 كيلو ضغط على كيلو سكر على نضارة بتركبها عشان تبحلق فيها ووزن بيزيد أوي أو بيقل أوي !

بقينا في وقت ... الشاشات فيه ذكية و الناس غبية .. أو بتستغبى !

بقينا نفتح الشاشات .. و نقفل الأبواب !

بقينا نشارك كل حاجة .. بس مش عارفين نشارك مشاعرنا !

بقينا مكملين و متجمعين ... بس في الإعلانات !

في لمة عيلة أو لمة صحاب حلوة .. بتضم 12 فرد ... 6 أشخاص و6 شاشات !

مش هقولك إقفل الأكونتات بتاعتك وإنعزل  عن العالم 

بص للجانب التاني على التوازي ... بص لحياتك (الحقيقية) 

قابل زمايلك و شوف ضحكتهم و(حسها)

إضحك من قلبك وإتخلى عن الإيموشنز 

إفتح الأبواب وخلي أصدقائك في العالم الواقعي أكتر من اللي ع الفيس !

شارك مشاعرك ... مش مجرد صورة فوقها كلمتين حلوين !

خليكو في اللمة بعددكم .. مش ضعف العدد !

العالم مش محتاج لإنسان آلي جديد بيتنفس وقلبه مابيدقش .. ويمكن ينسى يتنفس كمان وهو قاعد !