إعلامجي | الهوى وما أدراك ما الهوى!!

بقلم - أسماء حامد 

الهوى وما أدراك ما الهوى 😃 الهوى ده إللي هو القلب♡ إللي بيتعلق بحاجات ممكن تكون حرام أو تكون مش مكتوبة لنا أصلا أوصعبة المنال 😃 إللي غالبًا مودينا في داهية 😂 أو مش القلب، دي العادات والتقاليد والمبدأ إللي إتربينا عليها. 

إحنا إتربينا علي حاجة اسمها لو عملت كذا الناس هتنتقدك، الناس هتتكلم علينا، الناس هتاكل وشنا، الناس... الناس... مفيش الحاجة دي هتغضب ربنا هتزعل ربنا منك الحاجة دي حرام لاء!! كأن الناس دول هما إللي هيحسابونا يوم القيامة!! وهما إللي هيقرروا هندخل الجنة ولا النار، يعني ممكن جدًا تكون حاجة حرام بس مباحة في المجتمع بحكم إن أغلب الناس بتعملها.

أنا مش بعمم لأن في ناس فعلا مربية أولادها علي الحلال والحرام مش العيب والناس هتتكلم علينا تقول إيه، فعادي إنك تعمل الحاجة دي، تيجي أنت ربنا يهديك وتعرف إن ده حرام وربنا مش هيكون راضي عنك لو عملت كذا بس صعب تغير الحاجة دي لإنك تعودت عليها وقلبك متعلق بيها، وتحاول تسيبها وتبقي كويس تلاقي إللي بيتريق عليك ويقولك هتعلمنا عم الشيخ من امتي المشيخة دي يا عم، أنت هتعقدنا ليه أنت معقد وهكذا... 

هتلاقي ناس تانية بتحاول تقنعك إن الحاجة دي أصلا مش حرام ولا تغضب ربنا، أنا من رأيي إن أنا لو قلبي معلق بشئ وهو حرام سواء حرمة مؤقتة أو دائمة أسيبها وأتكل علي الله؛ لأن الحاجة دي ممكن تكون سبب في مشاكل كتير جدًا في حياتك أنت مش واخد بالك منها وتلاقيها بدأت تتحل لوحدها لما بعدت عن الهوى وسمعت كلام ربك وسمعت كلام دينك.

استودع قلبك عند ربنا وقل ربي أستودعك قلبي فلا تجعل فيه شئ يغضبك مني واجعل فيه كل ما يقربني إليك، ولو الحاجة دي قلبك معلق بيها أوي سواء كانت محرمة أو صعبة المنال أستودعها عند الله وربنا هيردهالك في وقتها لو كانت خير ليك أو هيعوضك بأحسن منها.

استودع قلبك عند ربنا وماتسمعش كلام أي حد يحاول يرجعك لسكة غلط أنت إخترت ربنا وخليك واثق إن ربنا مستحيل يخذلك وخلي في بالك دايما من الآية دي لأنها هتخليك تكمل وتعرف إنك صح هتساعدك إن كلامهم ميأثرش فيك وإنك تكمل صح... 

"وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ ۖ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا ۖ وَلَا تُطِعْ مَنْ أَغْفَلْنَا قَلْبَهُ عَن ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا ".