إعلامجي | الحق قطر عمرك قبل مايفوت!!

بقلم - أسماء حامد 

هتعيش كام مرة؟

سؤال غريب شوية صح؟!

بس عمرك سألته لنفسك؟، أو فكرت فيه؟ طيب وهتسأله لنفسك ليه أصلا!

هتسأله لنفسك عشان تفكر في حياتك اللي أنت عايشها دي أنت راضي عنها؟ حاببها؟ ولا كان نفسك في حياة تانية؟ أنا طبعا مش قصدي عدم الرضا عن حياتك أو الإعتراض علي القضاء والقدر؛ لأن دي حاجات من عند ربنا، بس بتكلم عن الحاجات اللي الانسان مخير فيها، القرارات بتاعتنا احنا.

يعني راضي عن تصرفاتك، روتينك، لو إجابتك كانت آه راضي يبقي أنت كده تمام وفل أوي.

لو لأ يبقي أنت محتاج قعدة روقان مع نفسك بس بلاش تكون بليل عشان تيتة بتقولي كلام الليل مدهون زبدة يصبح الصبح يسيح، خليها يوم تقوم فيه بدري كده قبل معادك بساعة مثلا، أو وقت ما تحب تقعد مع نفسك.

شوف اللي محتاج يتغير وايه اللي يفضل وممكن ورقة وقلم تكتب عاوز تغير إيه وعاوز تسيب إيه، ونفسك تعمل إيه ولسه ماعملتهوش واللي عملته غصب عنك ده ماتفكرش فيه انساه، وجرب تعمل حاجات جديدة كان نفسك تعملها.

 مستني إيه عشان تعمل حاجة بتحبها مستني إيه عشان تفرح نفسك؟!!

من الحاجات الحلوة اللي شفتها في TED فيديوا ل Matt Cutts اسمه Try Something New for 30 days 

بيحكي فيه عن فكرة تحدي التلاتين يوم وعمل فيها إيه في البداية هو كتب الحاجات اللي عاوز يضيفها في ال30 يوم دول وكتب بردو الحاجات اللي عاوز يتخلي عنها وبيحكي إن ال30 يوم دول زودوا ثقته في نفسه.

بنصحكم تشوفوا الفيديوا بنفسكم فعلا لإنه يستحق إنه يتشاف.

عن نفسي لما بقعد مع نفسي وأفكر في الحاجات اللي بخاف منها لدرجة الموت؛ لقيت إني بخاف جدا أموت وأنا لسه ماعملتش الحاجات اللي أنا عاوزها أو لسه ماوصلتش لهدفي، ولما اتسألت عن أكتر حاجة بخاف منها كانت إجابتي تلقائية بنفس الشئ بردو، بس أنا أصلا عملت إيه أنا عاوزاه ولا أنا عاوزه إيه، من سنة بس قررت أعمل اللي أنا عاوزاه عشان لو ماعرفتش يبقي علي الأقل هكون مت وأنا بحاول أعمل اللي بحبه، وفعلا عملت مش كل حاجة بس بالنسبة لقبل كده عملت وراضية عنها الحمدلله، ده بيختلف لكل واحد بالنسبة لحياتة والبيئة بتاعته والناس اللي حواليه ومدى تأثره بالكلام اللي بيتقال أنا نصيحتي هنا اضرب جزمة كبر دماغك ماتسمعش لحد بيحبطك لأن الناس دي هتلاقيها هي نفسها بتشجعك لما تلاقيك مصمم علي اللي بتعمله.

مستني إيه عشان تعمل حاجة لنفسك جربوا حتي لو 30يوم بس hدخلوا التحدي ده وشوفوا قد إيه هيفرق في حياتكم، سواء بقي عاوزين نعمل حاجة نبطل عادة مش حابينها، نجرب نعافر عشان حلم، أو هدف هتلاقي فرق في الشهر ده علn فكرة حتي لو ماكنتش اتحركت خطوة واحده لقدام، أعرف إن ده بسبب العادات والروتين اللي أنت كنت عايش فيه والموضوع هياخد وقت شوية بس يستحق.

جربوا قبل ما قطر العمر يفوتكم أحنا مش عارفين أحنا هنعيش لحد أمتى يمكن باقي من عمرنا سنة اتنين يوم شهر أسبوع الله أعلم بس اللي عارفينه إننا مش هنخلل في الدنيا ولما نروح هنتسأل: "عن عمرك فيما أفنيته".

لازم يكون عندك إجابة بلاش تكون علي السوشيال ميديا.

مش مستني أقول إنك تسعد أمك أبوك يكونوا راضين عنك لأنه من رضى ربك ومن أسباب التوفيق، تساعد غيرك لو تقدر ماتبخلش علي حد بعلم أو معلومة أنت عارفها دي كلها حسنات علي فكرة وبردو مش محتاجين أقول إن الحسنة بعشرة والعشرة ممكن تضاعف ل70 وأكتر.

هستني ناس تقول هي هتجرب أو لأ عشان تبقي تحكي لينا تجربتها وكانت حلوة ولا حلوة بردو😄.