إعلامجي | أنتِ جميلة ...✋

بقلم - أسماء حامد

-إيه ده انتي تخنتي أوي كده ليه ...؟!

-ماتخفي أكل شوية يعني عاجبك شكلك كده ...؟!

-أنتي عارفة أنا شفت مين إمبارح وكانت خاسة وشكلها زي القمر.. الدور والباقي علي اللي سايبة نفسها كده...

-كله من المحشي بطلي أكل محشي.

-إيه يابنتي ده هما بياكلوا أكلك في البيت ..؟

-يابختك بتاكلي ومابيبنش عليكي ... ؟!

-هو إنتي في حد هيبصلك بشكلك كده ... ؟!

أسئلة كتير ونصايح من اللي مالهاش أي تلاتين لازمة من أي واحدة حشرية في حياتك، أيوه عاجبني شكلي كده وبحبه وزي القمر ومش هبطل أكل محشي ...

عزيزتي البنت سيبك من أي حد أو أي واحده حشرية في حياتك، ماتسمعيش نصايح حد ولا تخلي الكلام اللي من النوع ده يحبطك، إنتي جميلة وجميلة أوي كمان، مافيش بنت مش جميلة أصلا أوعي حد يضحك عليكي، ويقولك شكلك كده مش حلو وتصدقيه، ده بيضحك عليكي عشان يضعف ثقتك في نفسك مش أكتر، أو حد منفسن منك عاوز نفسيتك في الأرض مثلا عشان يكون أحسن منك!! 

أه أحسن منك مافيش حد علي فكره عاوزك أحسن منه غير مامتك وباباكي، فماتاخديش كلامهم علي قلبك وتزعلي لأ عادي عيشي ياحبيبتي وانبسطي أوي وأفرحي..

أخرجي وأعملي شوبينج مايهمكيش البنت اللي في المحل لما تقابلك وتقولك: "لأ مقاسك مش عندنا .. مقاسك ف العبايات"

وعلي وشها إبتسامة صفرا سيبك منها، مقاسك في أي حاجة تعجبك عادي مالقتيش روحي أتليه وخيطي الموديل اللي عجبك..

الجمال مش بس شكل حلو أو ملامح حلوة أو حتي جسم حلو، الجمال روح حلوة إبتسامة صافية قلب أبيض، الجمال حياء ورقة..

هنعمل إيه بشكل حلو من غير روح حلوه؟! ياما ناس حلوين مابنحبهمش عشان شخصيتهم الاستفزازية..

ربنا خلق في كل بنت حاجة حلوة خاصة بيها هي لوحدها بتميزها عن غيرها وبتخلي الناس تشوفها أحلي بنت عرفوها، فياريت ماتقوليش علي نفسك شكلك مش حلو أو تخينة أو رفيعة، التخن مش عيب والرفع مش عيب العيب، إنك ماتكونيش واثقة في نفسك لمجرد كلام ناس مالهوش لازمة لا بيقدم ولا بيأخر، ناس كل همها تعيب علي غيرها وبس من غير مايشوفوا العيوب اللي فيهم..

عاوزه تخسي خسي عشان نفسك مش عشان حد تاني 

عاوزه تتخني إتخني عشان نفسك مش عشان حد تاني 

كوني جميلة من أجلك أنتي فأنتي أنثى تستحقين أن تنظري في المرآه ... وترين نفسك أجمل امرأة علي وجه هذا الكوكب .