إعلامجي | الكذب ألوان!!

بقلم - أسماء حامد 

عادي يعني دي كذبة بيضا ماتكبرش الموضوع بس أنت.

جملة أكيد نسمعها كتير كذبة بيضا.

هو الكذب ألوان؟ ومن أمتي أصلا!!

أهي دي أكبر كذبة إن الناس مقتنعة إن الكذب ألوان.

جملة كذبة بيضا وكذبة سودا دي غلط جدا الكذب مافيهوش ألوان، الكذب أسود بس.

تسمع عن قول الرسول صلي الله عليه وسلم: ((يطبع المؤمن علي الخلال كلها إلا الخيانة والكذب)).

طيب لما أتسأل عن الكذب: ((...أيكون المؤمن كذابا؟ فقال:لا)).

لسه مقتنعين إن في كذب أبيض.

عارفين حتي لو قلت لطفل صغير تعالى هديك حاجة حلوة عشان يكلمك وما أديتهوش كده كذب بردو!.

عبدالله بن عامر بيحكي أن أمه نادت عليه في يوم ورسول الله كان قاعد في بيتهم فأمه قالت: ((تعال أعطيك، فقال لها الرسول صلي الله عليه وسلم: وما أردت أن تعطيه؟ قالت: أعطيه تمرا، فقال لها: إنا أنكِ لو لم تعطيه شيئا كتبت عليك كذبة)).

كتير مننا بيكذب وهو فاكر للأسف إن الكذب ده هينجيه وإنه لو قال الحقيقة هيضيع نفسه بس العكس تمام.

من فترة كده إتحطيت في موقف بصراحة فكرت في كذب كتير عشان أخرج من الموقف من غير مشاكل ووجع دماغ، علي الرغم إني مبحبش الكذب بس أنا بني أدمه ومش معصومة، وكنت فعلا خلاص لقيت كذبة أكذبها عشان أخرج من الموقف وماعرفش إزاي كنت بدعي ربنا إنه يعدي الموقف علي خير آه بدعي ربنا إنه يعديه علي خير وأنا هكذب يعني حاجة ربنا مش راضي عنها بس سبحان الله جه ف بالي: ((ومن يتق الله يجعل له مخرجا ويرزقه من حيث لايحتسب)).

والله بردو فضلت محتاره أكذب ولا أعمل بالآية وقولت هسيبها زي ماتمشي، جيت أكذب لقيت نفسي أفتكرت الآية تاني فقلت الحقيقة، والموقف عدى علي خير وماحصلش أي حاجة آه والله عدى من غير أي حاجة خالص وراحة نفسية إحساس كان حلو إن ربنا ماسابنيش وإحساس بالثقة في ربنا إنه دايما كل ما بدعيه يستجيب ليا ولا مرة خذلني وفعلا ((ومن يتق الله يجعل له مخرجا)) الكذب مالوش رجلين الكذب هيجي وقت ويتكشف وهيبكون شكلك وحش قدام نفسك، وقدام الناس، وقدام ربنا قبل أي حاجة تانية.

ربنا ولا مرة خذلني ربنا بيستجيب والله ربنا مابيخذلش حد دعاه ربنا مابيردش حد لجأ له وهو مكسور لأ ده بالعكس ربنا بيردك مجبور الخاطر وقلبك راضي، ادعوا ربنا وسيبوا كل حاجه تمشي بأمره والتوكل عليه الله حسبي وكفي الله خير وكيل، استودعوا أموركم لله وتوكلوا عليه.

كنت قريت قصة شاب مسلم في بريطانيا كان مقدم علي شغل في شركة وكان في شباب مسلمين مقدمين وفي الـinterview كان سؤال أساسي بتشرب كام كاس خمر في اليوم فلما دخل وأتسأل السؤال ده فكر يكذب ويقول إنه بيشرب زي الباقي ولا يقول الصدق طيب لو قال لأ هيقولوا عليه مسلم متشدد وتضيع الوظيفة منه!! 

بس بعد تفكير سريع قال: لأ، فقالوا:ليه؟ أنت مريض؟

قال: لأ أنا مسلم؛ والخمر حرام.

قالوا: يعني لاتشربها حتي في عطلة نهاية الأسبوع؟ قال: نعم؛ لا أشربها.

لما نتيجة المقبولين ظهرت كان اسمه في أوائل المقبولين. 

بدأ الشغل وعدى وقت طويل عليه وجه في يوم شاف حد من المسؤلين اللي كانوا في الـinterview فسأله ليه كنتم بتسألوا عن شرب الخمر؟! قال: لأن الوظيفة المطلوبة في الحراسات، وكل ما يتوظف فيها حد فوجئنا به يشرب الخمر ويسكر ويضيع مكانه، وتتعرض الشركة للسرقة، فلما لقيناك ما بتشربش الخمر عرفنا إن لاقينا اللي أحنا عاوزينه فوظفناك.

بغض النظر لو كانت القصة مختلقة أو لأ بس أنا قرأتها من فترة طويلة يمكن وأنا في إعدادي بس أنا مقتنعة بيها ومقتنعة أكتر إن الكذب مابينفعش ولا بيجي من وراه غير بس وجع الدماغ ((فلا تطع المكذبين، ودوا لو تدهن فيدهنون)).

ربوا أولادكم علي الصدق ربوهم علي إن الصدق ينجي والكذب يهلك، عودوهم مهما كان الصدق صعب فهو الصح ومهما الكذب سهل فهو بيضيع وبيعمل مشاكل مالهاش أول من آخر عودوهم من وهما صغيرين حتي لو حاجة تافهه جدا يقولوا الصدق وبلاش الكذب وكل مايقولوا حاجة صدق كافئوهم وعرفوهم إن كده هما بيقربوا للجنة وإن لما يكذب هو بيبعد عن الجنة عشان لما يكبر يقدر يعيش صح ويكون مرتاح عشان ماتشيلوش ذنبهم وعليهم سبب في دخولكم الجنة حتي لو مش عارفين تعملوا أنتم ده بلاش كذب قدامهم بردو ربوا أولادكم صح وبردو صلحوا الغلط ده في نفسكم لو كنتم بتعملوه.