إعلامجي | عمرك كام؟!!

بقلم - أسماء حامد

عندك كام سنة؟

لأ، ما أقصدش سنك اللي في شهادة الميلاد، أقصد عمرك اللي أنت حاسه.

حد سأل نفسه السؤال ده قبل كده؟!

من فترة مش كبيرة شفت أمثلة كتير خلتني أقتنع إن العمر الحقيقي للشخص هو العمر اللي هو عايشه مش عمره الفعلي اللي في البطاقة أو شهادة الميلاد.

كان أول حاجة علي السوشيال ميديا فيديو لفيفي عبده كانت بترقص في فرح زي بنت في العشرينيات، بغض النظر عن إن أكيد مش دي القدوة اللي لازم أعمل زيها، بس هي روحها حلوة وبتعمل اللي هي عاوزاه من غير ماتتكسف ودي حاجة نقف لها فيها وقفة احترام.

شفت ناس كبيرة في السن وبحسهم في العشرينات والتلاتينات مش في الستينيات أو معدينها.

لما إتكلمت مع صحابي لقيت اللي بيقول أحنا كده بلغنا من العمر أرزله واللي تقولي كده عندي 60 سنة طيب الناس اللي سنهم أصلا كبير دي تفرق عننا إيه!

الناس دي فهمت الدنيا صح، مفيش حد ماعندهوش مشاكل في البيت في الشغل في الدراسة في أي حاجة أيا كانت بس هو عنده مشاكل، في ناس عارفه إزاي متخليش مشاكلها تعكنن عليها وتقدر تنبسط ناس عرفت إن ماينفعش نسمع لكلام الناس لأن كل واحد أدرى بحاله وعشان مفيش حد ماعندهوش مشاكل، فمينفعش أضايق نفسي أكتر بكلام الناس الناس قالت الناس عادت ......

عيشوا أعملوا اللي أنتم عاوزينه ماتفكروش في الناس هتقول إيه طالما الحاجة دي "مش حــــــــــرام".

هنعيش في الدنيا مرة واحدة بس ✋