إعلامجي | الصداقة ...

بقلم - رنا الجندي

من أهم الحقائق اللي لازم تعرفها أنك لو عندك صديق حقيقي يبقي أنت نسبة إصابتك بالأمراض النفسية بتقل.
كلنا تقريبا بنعيش حياتنا ندور على الصديق ندور على حد يكون جنبنا في حزننا قبل فرحنا، حد نحتاجه نلاقيه يسمع كلامنا اللي أحياناً كتير بيكون تافه.

يسمع مشاكلنا اللي عادي جداً لو كانت في نظر الكل لا ترقي لكلمة مشكلة، حد يشاركنا أوقات لعبنا وأوقات الجد ، يكون معانا في لحظاتنا اللي بتمثلنا أهمية كبير.

في مننا لاقي الصديق ده بشري وفي اللي دور ولاقي أن الحيوانات أفضل، مش مشكلتنا نوعه ايه طالما في النهاية بيمثلك الصديق الحقيقي، يكفي إنك تحاول تكون أنت الصديق اللي بتبحث عنه.

جاك ارثر كان مسجون في إحدي مقاطعات أمريكا الحراس لحظوا أن سلوك جاك بيتغير بعد ميعاد زيارة شخص واحد فقط
أحيانا بيكون شخص مطيع جداً للحراس وأحيانا بيبكي كتير بعد ما الشخص ده يمشي.  تتابعوا الشخص ده عشان عايزين يعرفوا هو بيمثل ايه لـجاك او علاقتهم ببع.

عرفوا أن الشخص ده صديق جاك المقرب والمحامي بتاعه كان بيسعي أن جاك يخرج لحسن سيره داخل السجن، بينصحه بأنه يكون كويس أحيانا باللين وأحيانا بالشدة وجاك كان متأثر جداً بيه لذلك كانت حالته بتختلف حسب تعامل صديقه ده.

الخبراء الجنائيين استخلصوا من الموقف ده إن معظم السجناء المراهقين بيكون السبب في بداية دخولهم الاجرام أصدقائهم
في مثل بيقول اعرف فلان من صاحبه، والصاحب ساحب.

في ظاهرة بين البنات خاصةً إنهم بيتاثروا بآراء صديقاتهم جداً حتى في اختيارهم أزواجهم وأدق اختيارات حياتهم. لوين صحفية لسه في بداية حياتها المهنية صديقتها المقربة ماري، لما سألوا لوين عنها قالت إنها بتمثل لها آيه من آيات الكتاب المقدس، وبعد خمس سنين رأيها كان مختلف تماماً عن لوين قالت إنها باب من أبواب الجحيم.

ماري ولوين كانوا أصدقاء، بس للأسف ماري استخدمت حب لوين وثقتها وكانت بتهرب من خلالها مواد مخدرة بدون علمها في بداية الامر ولكن عند اكتشاف لوين اقنعتها ماري بأن ذلك أفضل ما سيفعلوه لمستقبلهم وتأمين وضعهم المادي.

جميل إنك يكون ليك صديق والأجمل إنه ميكونش بابك للجحيم.

انتقاء الأصدقاء أصعب من مواجهة الأعداء، صديقك نقطة ضعفك وقوتك لازم تعرف تحدد هو انهي نقطة فيهم.
مواجهة العدو أهون وألطف من مواجهة صديق يعرف مكنون ما بداخلك.

وأخيراّ سلاماً على من وجد اخّ لم تلده أمه ، وشفيعاً يوم الحشر ، وداعياً بعد الممات، ومصلياً عليه بلا ركوعاً أو سجود.

#عالم_مش_عاجبهم_العجب_ياخال