إعلامجي | بالدلائل والبراهين

بقلم - رنا الجندي

الـ Memories على الفيس بوك أكبر دليل على أن لا شيء يبقى ولا أحد سيظل كما كان!!

1_ عن بوستات كنت كاتبها لما بتشوفها حاليًا مش بتصدق انك كنت بالهبل ده.

2_ عن ناس كانت ثابتة تقريبا في كل بوستاتك وكأنهم إمضاء رسمي وحاليًا مش موجودين في بوستاتك لأنهم مالهمش وجود في حياتك.

3_ عن الكومنتات والبوستات المضحكة اللي لما بتجيلك في الـNotifications بترسم إبتسامة على وشك وأحيانا بتبقى إبتسامة حزن لو أصحابها مش على حالهم!!

4_ عن آرائك السياسية أو الاجتماعية ومدى تغيرك سواء بالإيجاب أو بالسلب.

5_ عن اصحابك اللي طاروا مع الريح، اعذرهم لا شيء يبقى حتى انت ستفنى.

6_ عن ناس دخلوا حياتك وخرجوا من حياتك قبل ما تلحق حتى تلاحظ وجودهم.

7_ عن أيام ما كنت بتشير أغاني أو كلام ناس متعرفهاش وناس تدخل تشكر فيك وكأنك أنت اللي قايل الكلام ده مش ناقله!!

8_ عن صورك علي المدى من أيام صور الكرتون والورد والحاجات اللي هتكتشف من خلالها انك فعلاً ذوقك اتغير وفكرك وكل شيء.

9_ عن أمنياتك أو بوستات بترسم فيها لمستقبلك حاليًا لو المستقبل ده أتعرض عليك ببلاش هتسيبه وتمشي!!

10_ عن حاجات جميلة وحاجات مجرد انك تفتكرها تضايق عن ناس مازالوا على العهد وعن ناس معرفوش أن في حاجة اسمها عهد؛ عن أمنيات ماتت وغيرها خد مكانها ^_^

الخلاصة إن الماضي مش حاجة وحشة انك تهرب منها سواء كان ماضي سعيد أو حزين!! 

الماضي ده كان حياتك ولازم تتقبلها بكل حالاتها وتفتكرها عشان تتعلم منها.

الذكريات جميلة في كل حالاتها حتى لو ذكرى سيئة فعلاً هتستفيد منها.

#شكرا_مارك_حافظت_علي_الإبتسامة 

#عالم_مش_عاجبهم_العجب_ياخال