إعلامجي | الإنجاب ... متجيبش أطفال في البلد دي!!

بقلم - رنا الجندي 

صديقتي قررت بعد ست سنوات زواج أن تنجب!! 

إستغربت من كلامها أنهم كانوا مأجلين مشروع الأطفال وإن ده كان قرارهم الشخصي بدون أي أسباب صحية؛ طبعا بصرف النظر عن كمية الضغوطات اللي مروا بيها سواء من عائلاتهم أو المعارف والأصحاب، كمية أسئلة لا حصر لها، الجيران كانوا بيحجزوا مواعيد ليهم مع الدكاترة اللي عارفينهم!! أهلهم فقدوا الأمل فيهم!!

كان ردهم علي كل الضغوطات دي في البداية حقيقي، إنهم مأجلين الفكرة عشان يدرسوا كويس إزاي هيجيبوا طفل في المجتمع ده، كانوا عايزين يهيئوا كل الظروف للطفل ده إنه يعيش عيشة كريمة؛ لذلك إشتغلوا بره ولما إستقروا، وحياتهم من وجهة نظرهم أصبحت مهيئة للطفل ده فكروا إن ده الوقت الصح!!

خلال الفترة دي غيروا ردهم لرد تاني غير حقيقي ولكن كان تذكرة بالنسبة ليهم في حق الجوكر (حق الصمت) 

قالوا إن أسبابهم صحية ومفيش أمل...

لما كلمتني إنها نازلة مصر إجازة عشان تلحق ترجع قبل ميعاد الولادة لأنها طبعا مش عايزة تولد في مصر!!

سألتها .. ليه ؟!

سألتني لو مكاني كنتي هتجيبي أطفال يعيشوا في المجتمع ده؟!!

قولتلها أنا مش بشتري جزمة بيضاء في البلد دي وبخاف ألبس ذهبي!! 

بقدم في شغل وعارفة أنه مش هيجيلي!!

بكتب كلام وعارفة أن ممكن أتحبس بسببه!! 

بحضر ماجستير خلصت كل حاجة فيه ودكتور ابن حلال موقفلي الدنيا عشان مادته!!

معتقدش إني أحب أجيب أطفال في مجتمع أنا شخصيًا مش عارفة أخد حقي فيه!! 

إزاي هجيب أطفال وإزاي هربيهم على مبادئ وهمية مش موجودة في أرض الواقع؟! 

هعلمهم الحرية وأحبسهم!!

هعلمهم الصدق وأعرفهم أنهم لازم يكدبوا لو ظابط وقفهم!! 

هعلمهم أنهم مينفعش يتعاملوا بالعنف وأسيبهم يتمارس عليهم العنف الخارجي!! 

إزاي هعيشهم في الإزدواجية دي؟! كان لازم أقولك أنك أجدع قرار عملتيه أنك مش هتجيبي طفل في مصر...

#عالم_مش_عاجبهم_العجب_ياخال