إعلامجي | عــاجــل دار الإفــــتاء!!

بقلم - أسماء حامد

ليه دار الإفتاء ماتطلعش فتوى بإن الزعل حرام!!

أنا عارفة إن ده يمكن يكون جنان؛ بس تخيلوا كده لو الزعل حرام والبني آدم اللي يزعل ده يبقي بيعصي ربنا!! تخيلتوا؟ تفتكروا هيكون في ناس كتير زعلانة ولا هنكون عاملين إزاي؟! ماعرفش هنكون إزاي بس بحاول أتخيل إن لو ده حصل هنشوف الناس في الشارع كلها مبسوطة، ولا هنشوفهم زعلانين بردو!! 

حد يجي يقولي إية الجنان والهبل اللي بتقوليه ده؟! أقولكم ماعرفش بس ده اللي فكرت فيه من زمان وبحاول أطبقه علي نفسي عشان الزعل بيوصل لنتيجة سلبية جدًا وهي اليأس، طيب وإيه الحرام في كده؟! كلنا بيجي علينا وقت ونضعف فيه!! آه صح بس ربنا بيقول ((ولا تيأسوا من روح الله إنه لا ييأس من روح الله إلا القوم الكافرون)) صدق الله العظيم، وإحنا مش كافرون.

إحنا بنحمل ديانة السعادة ابتسموا يا زعلانين واطلبوا القوة والثبات من الله ده رحيم بينا أكتر من نفسنا، عارف إيه ينفع لنا أكتر مننا إحنا مادخلناش في علم الغيب لو علمتم الغيب لاخترتم الواقع؛ وافتكروا دائما "لو كان خير لبقى"، (وعسى أن تكرهوا شيئا وهو خير لكم).

مش لازم حتي دار الإفتاء تطلع فتوى كده لأن حتي لو طلعت فتوى بإن الزعل حرام اللي عاوز يفضل زعلان هيفضل زعلان، واللي عاوز يكون قوي ويغلب حزنه هيغلبه والقوي هو اللي بيوصل لهدفه، واللي يستسلم لحزنه عمره ما هيتحرك من مكانه في أي حاجة عاوز يعملها في حياته بسبب اليأس ده فماتخليش اليأس يغلبك ومهما ضاقت هتفرج؛ "ضاقت فلما استحكمت حلقاتها فرجت وكنت أظنها لاتفرج".