إعلامجي | الــــــوهــم

بقلم - أسماء حامد

أنا كأسماء مقتنعة جدا إن اللي بيوهم نفسه بحاجة بيعيش فيها.

زي لما توهم نفسك بمرض هتفضل عايش فيه حتي لو مش عندك، كنت سمعت قبل كدا إن في أمراض بتيجي بالوهم. وهمت نفسك إن حياتك كلها سودا مافيهاش ألوان هتفضل عايش وماتشوفش غير اللون الأسود في حياتك.

وهمت نفسك بالسعادة هتعيش سعيد، بس بلاش الوهم سواء أبيض أو أسود، الحياة ألوان كتيرة أبيض، أسود، أخضر، أزرق،.......

عيشوا الواقع حتى لو مر بس أكيد في أوقات حلوة عدت عليكم بتهون الصعب، عودوا نفسكم تعافروا مع الدنيا وتتحملوا الصعب عشان لما توصلوا لحاجة تحسوا بقيمتها.

ماتعيشوش الوهم لأن هيخليك محلك سر مش هتتحرك ولا تنجز حاجة لأن في عالم موازي أنت شخص ناجح أو شخص بائس.

الوهم بيهدك من غير ماتحس بتلاقي نفسك في تراجع سواء أوهمت نفسك إنك ناجح وسعيد ده هيخليك تغمض عينك عن مشاكلك اللي لازم تقف عندها وتحلها وهيعودك علي الهروب وفي حاجات لازم تواجه ماينفعش تهرب أو تتنازل هتصحى فجأة تلاقي نفسك ماعملتش حاجة وماتعرفش عمرك راح فين.

أو عيشت نفسك في وهم أنك شخص بائس ومش نافع في حاجة وأنت تكون قربت توصل أو محتاج تكه وتبقي كويس.

عيشوا الواقع وشوفوا العيب فين وإيه اللي محتاج يتصلح فيكم وصلحوا، خلوا كل يوم باللون بتاعه مش باللون بتاعكم وأخرجوا للنور عشان تقدروا تشوفوا الألوان دي.

الوهم بيهد تاني ونالت وعاشر الوهم بيهد.