إعلامجي | الجواز عن حب ولا جواز الصالونات؟

بقلم - أميرة حسن

مقولة منتشرة جدا في زمننا هذا وهي أن الجواز عن حب مش بيستمر والسؤال هنا الجواز عن حب ولا جواز الصالونات هو اللي ليه مستقبل أكبر في الاستمرارية.

جواز الصالونات عبارة عن واحد بيجي يتقدم لواحدة مشفهاش قبل كده حتي بيجي عن طريق الوالدة أو طنط فلانه، وتبدأ المقولات الشهيرة زي "الحب بيجي بعد الجواز" و"أهم حاجة العشرة بين الزوجين".

وهنا تم تبادل مختلف الآراء:

- لما هو مش عارف يختار لنفسه أمال بعد كده هيعمل إيه؟

- أنا مش ممكن أرضي أتجوز واحد مامته ولا طنط مين هي اللي مختراني ليه!

- البنت غالية أوي لما بتشتري ذهب بتبقي رايحة المحل يطلعلك المجوهرات من العلبة ويحطهالك في علبة لكن الاكسسوارات الفالصو بتتباع علي الرصيف..

- الحب شئ جميل ولكن في زمننا هذا تم تشويهه وبالتالي فالوسيلة الآمنة هي جواز الصالونات وبيتسمي بالحب المحترم في النور فما فائدة الخطوبة انها للتعارف والتآلف والحب بس في النور

- معندوش وقت يدور لنفسه اصله بيكون نفسه عامل زي اللي بيشتري الماديليه قبل العربية!!

- أنا مش للبيع ولا شوال بطاطس حد يعايني وزي ماهو ليه مواصفات من علام وجمال أنا كمان ليا مواصفات، الحب مش صرمحة بس لازم يكون علي أساس سليم الحب أحلي شعور تحسه البنت فلازم تفتخري انك بتحبي وماتتكسفيش انه يبان عليكي لان الحاجة الغلط هي اللي بتتداري .

- الحب في زمننا دا صرمحة وتقضية وقت واللي بينكر دا بيدفن رأسه في الرمل طيب ماهو الراجل بيتقدم وانتي ممكن ترفضي عادي يعني هو مش داخل سوق عكاظ يختار جارية كله بالرضا والقبول...

المهم بعد تبادل الآراء ووجهات النظر لو فكرنا بالمنطق والعقل شويه هنلاقي إن الحب دا من أهم الأسباب الي تخلي الواحد أو الواحدة يفكروا يتجوزوا أصلا!! 

الفكرة كلها ازاي نفكر صح ونتعامل مع الحب صح فنوصل لأسرة ومجتمع سوي 😊